الأبراج و الاعتذار

الأبراج و الاعتذار

كل واحد مننا عنده علاقة ماتخلى من المشادات كلامية و الزعل و التسامح و الرضى والحب و العصبية ، لكن لو غلطت بحق أحد عزيز عليك كيف راح ترضيه وتطيّب خاطره ؟ 

هنا بتلقون كل برج وكيف يرضى و إيش يرضيه :

برج الحمل

على الرغم من انه بسرعة يعصب ويزعل لكنه ما ينسى الاساءة وممكن يختفي وينقطع عنك وما يكلمك لـ كم يوم ، بس اذا راودته فكرة انك ممكن تسوي سواته و بيفقدك  راح يخاف . اعتذر له و أوعده انك ماتكرر نفس هالخطأ وبيصفى قلبه تجاهك

برج الثور

يحبون يناقشون وينرفزون غيرهم عشان بس يتكلمون ، يحسون ان التصارع الفكري مع غيرهم شي ممتع، ممكن يجرك الثور لنقاش حاد مليان ألفاظ شنيعة " إذا كان معصب وزعلان منك" لذلك حاول تمتص غضبه عليك بلمسات حنونه وكلام لطيف وهادي

برج الجوزاء

ينسى الإساءة بسرعة ولا يعرف قلبه الحقد لكن دايماً الجوزائي يتعرضون لإهانات لفظية ماتغيب عن باله لكنه يسكت عنها لين تجي الفرصة المناسبة عشان يرد عليك فيها، لذلك عشان مايستقعد لك حاول ترضيه بكلام حلو او مكالمة تبين له شوقك له أو بهدية لها قيمتها

 

برج السرطان

انتبه تزعل السرطان لأنه ماراح ينسى ولا يهدأ ولا يسامحك لين ياخذ بحقه منك وممكن ينتظر الفرصة المناسبة عشان ياخذ بحقه منك بطرقة تقهرك ، حاول ترضيه وتاخذه لآماكن يحبها أو سولف معه بـ ليلة رايقة وهادية وافتح معه صفحة جديدة عشان ينسى اساءتك له

برج الاسد

ينحرج الاسد إذا دخل في نقاش حاد مع أي أحد خصوصا إذا تمادى الطرف الثاني وأساء له ، لا تنتظر من الأسد أي مبادرة للصلح لأن كرامته فوق كل شيء لذلك بادر أنت لو بغيت علاقتك معه تستمر وتكلم عن مشكلتكم من باب المزح والصلح و بينسى ويرد لك.

برج العذراء

عنيد وميوله انتقامية ولو صارت بينكم مشكلة صعب ترجّعه معك زي ما كان ، ماراح يقبل منك مجرد كلمة "آسف" لذلك لازم تسوي شي عظيم يرضيه أو تخلي أحد يتدخل بينكم وممكنه يقنعه يسامحك.

برج الميزان

صاحب هالبرج يسوي من الحبة قبة ، يكبر المشكلة لين يصير في اختلافات ونقاشات ومناوشات قوية وجارحة بينكم ، ماتقدرون تعالجون هالمشكلة إلا بالهدوء وتنتظرون الوقت يمر عشان تهدأ الأمور و تنحل و ينسى الميزاني اساءتك ، ممكن لعبة أو سالفة هادية ورايقة تنهي التوتر اللي بينكم .

 

برج العقرب

لو تهاوشت انت و العقرب فـ ممكن تدوم هالهوشة والمشاحنات لسنوات طويلة لأنه ما يتراجع عن موقفه ولا يسامح أبداً بحكم حقده على أي شخص يسيء له ، لكن ممكن " يتناسى " اساءتك بدعوة لحفلة ضخمة أو بهدية فخمة .

برج القوس

أسرع برج ينسى الاساءة هو صاحب هالبرج ويتجاوز كل الخلافات والمشاحنات وعنده قدرة الفهم والاستيعاب لكل جدال و نقاش و يعرف كيف ينهيه ، لذلك استغل هالفرصة لو اللي زعلته من القوس وراجع موضوعكم و حاول ترضيه لأنه يرضى بأبسط الحلول

  

برج الجدي

مايسامحك الجدي بسرعة لأنه مثل الأسد معتز بكرامته و حريص على صورته بعيون غيره ، لو زعلته ممكن يحاول يخلي الناس يوقفون ضدك عشان يشوه صورتك بعينهم لأنه يظن إن صورته تشوهت بسببك

، لكن سهل جداً تسترجع علاقتك معاه إذا قدمت له اعتذار قدام الكل خصوصا اللي حضروا معاكم بوقت النقاش  ..

برج الدلو

مستحيل يعترف بخطأه تجاه أي أحد لأنه يشوف نفسه مثال للخُلق الطيب ، وممكن يسوي نفسه سامحك إذا نشبت له بس عشان يفتك من إلحاحك لكن صعب جدا يطلع اللي بخاطره لأنه يكره بسرعه و يطيب خاطره من الشخص أو التصرف أو المكان

برج الحوت

صاحب هالبرح من أحد المتعالين وخلافك معاه بيحول علاقتكم لجحيم! حتى لو سوى نفسه سامحك ف ممكن يستغل أي فرصة عشان يذكرك باللي سويته معه لذلك جرب تهديه هديّة قيمة وكبيرة عشان تذكره فيها كل ما ذكرك بغلطتك ، بكذا بيسكت و يستحي