الابراج و الحفلات

تقدرون تميزون برج الشخص اذا حضر لحفلة معينة 

من خلال تصرفاته ، لذلك راح احكي لكم عن :

كيف يتصرفون الأشخاص في الحفلات حسب أبراجهم؟

"هالحكي يعتمد على موقع كوكبيّ عطارد و الشمس"

الحمل

دايما تلاحظون الحمل متلهف للحفلة أكثر من صاحبها و يدخل للحفل بكل حماس واندفاع ، صوتهم دايما عالي وواضح ، جريئين بالتصرفات والكلام ، يحبون يحييُون الحفلات الصاخبة ويتفاعلون فيها بقوة ، تلقونه محتفل ويرقص بكل صخب وجرأة حتى أكثر من صاحب الحفلة نفسها!

بتلاحظون أنثى الحمل كل شوي تقوم لدورة المياه تشيّك على لبسها و مكياجها وشكلها و تعدّل اللي يبغى له تعديل

الثور

يحبون يحضرون الحفلات والمناسبات الخاصة أو العائلية فقط ، ويفضلون الحفلة تكون مُحافظة ومحدودة الأشخاص من أهل و أصدقاء ، ومن النوع اللي ينظمون الحفلات في بيوتهم وبشكل هادي ولطيف ، اجتماعيين لكنهم محافظين ومحدودين العلاقات ، يلبون دعوتك للحفلة ولو كانت صاخبة ومزعجة بالنسبة لهم ، فكرة الحفلات الصاخبة منبوذة بالنسبة للثور لكنه يحضرها ، ما يتكلم كثير و يكتفي بتوزيع الابتسامات والسوالف مع الناس المقربة منه ، ولو كان الحفلة عائلية ومختصرة بينبسط فيها اكثر .

الجوزاء

احيانا تلقاهم منطلقين ومحتفلين ومبسوطين ومايخلون احد ما يسلمون عليه بحكم انهم اجتماعيين ، و أحيانا ينعزلون ويكونون باردين وما يتفاعلون مع الناس ويكون ما لهم خلق و يستغبون كثير ، وهالحالتين ترجع لتحكم المزاجية بتصرفاتهم ، ما تفرق معهم لو كانت الحفلة صاخبة و ناس كثيرة أو هادية و محدودة الأشخاص ، الأهم عندهم الوناسة و يعتبرها فرصة لتغيير الروتين و الجوّ

السرطان

بما إنه معروف عن السرطانيين انهم ناعمين فـ برضو حضورهم ناعم و هادي و لطيف ، ما يحبون يحضرون الحفلات اللي فيها صخب و زحمة و يفضلون الحفلات اللي أجوائها رومنسية ، ما يتكلمون مع أي أحد و لكن لو شافوا شخص يعرفونه بيجلسون عنده وما يسولفون الا معه ، يحبون يلفتون الأنظار ويحاولون يلفتون النظر بتصرفات أو بمشية معينة ، ولكن طبيعتهم يغلب عليها الخجل !

الأسد

يحبون تكون لهم لمسة في أي حفلة يحضرونها حتى لو ما كانت هالحفلة تخصهم ، تشوفونه يتدخل بالتنظيم أو بالحضور ، ودائمًا يلقون ترحيب بسبب هالتصرفات من أصحاب الحفلة "لو كانوا أصدقاء" ، مندفعين و دايماً يستمتعون بحضور أي حفلة ويشوفون فيها فرصة للتعرف على ناس جديدة و يتفاعلون مع الكل سواء يعرفونهم أو لا ، يحبون يلفتون النظر ولو ما لفتوا نظرك بتصرف منهم أو بمشيتهم راح يلفتون نظرك بلبسهم أو طريقتهم بالكلام ، متفتحين وما يحبون الانعزال بوقت زي كذا و يظهرون الجانب الاجتماعي فيهم ويتكلمون عن أنفسهم كثير ومن دون ما يحسون بأنفسهم ، يهتمون بتنظيم الحفلة لو كانت لشخص مقرب منهم و حريصين عليها كأنها لهم ، وبالرغم من اهتمامهم فيها إلا إنهم ما يحضرون مبكرين ويرجع هالتصرف لحب لفت الانتباه والنظر عشان ينتظرهم الناس ويسألون عنهم.

تحب أنثى الأسد تدخلـ آخر شخص عشان الكل ينتبه لطلتها و زي ما قلت :

 عشان تلفت الانتباه والانظار لها ولطلتها.

العذراء

يفضلون يحضرون الحفلات و المناسبات "المُحافظة" الهادية واللي تتبع العادات و التقاليد وغالبًا ما يحضرون الا الحفلات العائلية فقط!

متحفظين و يشوفون الراحة بهالتحفظ ، وما يحبون يحضرون حفلات ما يدرون من بيحضر فيها لذلك تلقاهم يحصرون انفسهم بحضور الحفلات العائلية لأنهم يعرفون كل شخص فيها ، لو حضروا حفلة أعجبتهم بتلقاهم أكثر الناس تفاعل و كل شوي تشوفونهم يجسلون مع شخص جديد و يسولفون معه و مبسوطين والعكس صحيح.

من النوع اللي يحضرون للحفلة آخر الناس و يطلعون منها أول ناس!

الميزان

يفضلون حضور أي حفلة فيها جمال !

سواء كان الجمال بملامح الناس اللي حاضرة أو بالديكور أو لجمال "الداعي" للحفلة أو جمال الـ music اللي تعطي جوّ راقي ، يحبون الحفلات اللي اجوائها راقية و تميل للرومنسية ، يحبون حصور الحفلات اللي فيها تميّز من ناحية الألوان وتناسقها مع الديكور ، إذا حضروا الحفل و حصّلوا اللي يونسهم من جمال أو أغاني رايقة بتلقاهم أكثر الناس تفاعلاً و يندفعون و يرقصون و يتحمسون .

العقرب

مزاجيين و متحفظين و طبيعتهم جذابة و لهم طلّة ويعرفون هالشيء من كلام و نظرات اللي حولهم، داخليًا واثقين من أنفسهم و هالثقة تنعكس عليهم خارجيًا ، نظراتهم فيها غرور ولكنهم مو مغرورين ، مايحضرون أي حفلة وإن حضروا بيهتمون بهالحفلة اهتمام عظيم من ملابسهم إلى ملابس اللي بيحضرون معهم "من أهلهم" ، يفكرون وينشغلون بـ كيف يتعاملون إذا راحوا و كيف يجذبون الناس لهم و كيف يصيرون "محط إعجاب" لغيرهم.

القوس

متفتحين و روحهم حلوه وما عندهم مشكلة يتعرفون على ناس جديدة و غريبة ومختلفة ، يتأقلمون بسرعة على أي حياة جديدة وهالشي ينعكس على طريقة حضورهم لحفلة من الحفلات ، تلقونهم متفاعلين و دايم يضحكون و يضحّكون اللي حولهم و يرحبون بالكل و كأنهم أصحاب الحفلة ، كلامهم ودود و لطيف و يمدحون طلّات غيرهم وبكل قوة و جرأة ، وسيعين بال و منشرحة صدورهم لذلك هالشي ينعكس على الكل بتصرفاتهم مع غيرهم ، وجودهم بالحفلة يسبب فرحه لأنهم ناس عفوية و يوزعون السعادة على الكل بتصرفاتهم في أي حفلة يحضرونها ، ما يفوّت ولا حفلة و أصحاب واجب.

الجدي

انعزاليين و تعاملهم مع الحضور ثقيل ، راح تميزونهم بسبب مشيتهم وملامح وجيههم الجديّه ،ما يتقبلون المزح والضحك ويستحقرون تصرفات القوس في إنه جدا عفوي ، يغلب عليهم التحفظ العنيف و يميلون للعزلة وما يحبون يختلطون مع الناس و هالشيء من اختيارهم و مختارينه بكل ثقة لأنه يريحهم ، هم أهدأ الحضور وأقلهم حماس بالكلام و التفاعل .

الدلو

اكثر ناس تتصرف تصرفات غريبة ومو مفهومة و هالشيء يرجع لطبيعتهم الهوائية المتغيّرة ، يحبون يحضرون الحفلات بأي وقت كانت و يعطون أنفسهم مجال إنهم يطلقون العنان لجنونهم قدام غيرهم. يهتمون بالشكل و المظهر أكثر من الجوهر لذلك تلقى أغلبهم أشكالهم مرتبة لكن لو تكلّم جاب العيد ، مهتمين بالموضة ويتبعونها ويلبسون أحدث شيء دارج ، يندمجون بالحفلات و لكنهم ما يتكلمون كثير و ينجذبون للأشخاص المتجددين ويتقبلون كل شخص ثقافته مختلفة عنهم و لا يفرقون بين الناس.

بالعربي : مو عنصريين .

الحوت

أغلبهم مزاجيين و دايمًا متحفظين و خجولين ، هاديين و لهم جاذبية ملفته و لكنها ناعمة جدا ، هدوئهم مُلفت كمان و تجذبك ابتساماتهم وملامحهم الـ baby face و يعطونك نظرات عفوية ومريحة تأسر قلبك ، ما يحبون يحضرون الحفلات الصاخبة و لا يحبون الرقص اللي فيه نطنطه و استهبال و حق الضحك .. يحبون النعومة والهداوة بكل تصرفاتهم.